अंगारा

दिवसाच्या आकांक्षांना
रात्रीचा मोका
मनाच्या हिंदोळ्याला
काळजाचा झोका

मनही फाटलं
काळीज तुटलं
जीवन मात्र
झुलतच राहिलं...

सारं सरलं
खाली उरलं
फाटकी झोळी
काळा अंगारा...

---संतोष डुकरे (College Of Agriculture, 2005)

सारं काही तसंच आहे

आहे का अजून तुझ्या
गालावरती खट्याळ रुसवा
ओठांवर रक्तीमा अन..
नेत्रांची अस्वस्थ लवलव
थोडी हुहुर मनाची
माझ्यासाठी...

उडते का अजूनही
उनाड ओढणी वाऱ्यावरती
लवतो का अधेमधे
आठवणीने डावा डोळा
कधीमधी... माझ्यासाठी...

अजूनही धरतेस का,
सोमवार निरंकार,
अजूनही भांडतेस का
मित्रांशी माझ्यावरुन अन..
अजूनही रडतेस का
रात्र रात्र हिरमुसून
कधीमधी... माझ्यासाठी...

तुझं मला ठावूक नाही
तुला आता नवं नातं
आणि हातात नवा हात
पण मी मात्र तसाच आहे
तोच आहे अजून
त्याच प्रेमाच्या धुक्‍यात...

तिच आहे आठवण
आणि तोच विरह
तिच माझी जगण्याची
केविलवाणी धडपड
तुझ्याविना...

सारं काही तसंच आहे...
तसंच आहे अजूनही
कोरड्या पावसातील भिजत रहाणं
स्वप्नांच्या ओहळात
वेळी अवेळी डुबत रहाणं
तुझ्यासह... तुझ्याविना...

आता रोजचीच ही कातरवेळ
उदास व्याकूळ आठवणी
आणि हा एकांत
तुझ्याविना... जिवघेना...

सारं काही तसंच आहे
सारं काही तेच आहे
तेच शब्द ह्दयात
आणि तोच सल मनात
सारं काही तसंच आहे
सारं काही तसंच राहिल...

-संतोष डुकरे (BVB, Kothrud, Pune, 2007)